കലോത്സവ കാഴ്ച്ചകൾ ഒപ്പിയെടുത്തും റിപ്പോർട്ടർമാരായും ലിറ്റിൽ കൈറ്റ്സ് കുട്ടി റിപ്പോർട്ടർമാർ.

കോഴിക്കോട് : വലിയൊരു മാധ്യമ പട കൗമാര കലോത്സവത്തിൻ്റെ എല്ലാ വിസ്മയ കലാ കാഴ്ചകളും ഒപ്പിയെടുക്കുമ്പോൾ, ഞങ്ങൾക്കും കുറച്ചെങ്കിലും ഇവ സാധ്യമാണ് എന്ന് തെളിയിച്ച് , കൈറ്റ്സ് കുട്ടി റിപ്പാർട്ടർമാർ കലോത്സവ വേദികളിൽ സജീവം.

സംസ്ഥാന സ്കൂൾ കലോത്സവത്തിലെ ഓരോ നിമിഷവും ക്യാമറക്കണ്ണുകളിൽ ഒപ്പിയെടുത്തും കലോത്സവ നഗരിയിലെ വാർത്തകൾ റിപ്പോർട്ട് ചെയ്തും ലിറ്റിൽ കൈറ്റ്സ് അംഗങ്ങൾ. വേദികളിലും അണിയറകളിലും സജീവമായ നൂറുക്കണക്കിന്  ലിറ്റിൽ കൈറ്റ്സ് അംഗങ്ങളാണ് കലോത്സവം ഡോക്യുമെൻ്റേഷൻ പ്രവർത്തനങ്ങളുടെ ഭാഗമാകുന്നത്.

കലോത്സവത്തിന്റെ മനോഹര ദൃശ്യങ്ങൾ ക്യാമറയിലേക്ക് പകർത്തിയും കൈറ്റ്സ് ചാനലിന് വേണ്ടി വാർത്തകൾ തയ്യാറാക്കിയും സജീവ സാന്നിധ്യമാണ് ഈ കുട്ടിക്കൂട്ടം. ഓരോ വേദികളിലും രണ്ട് വീതം ക്യാമറമാൻമാരാണ് കലോത്സവ ചിത്രങ്ങൾ പകർത്താനുള്ളത്. കൂടാതെ  ജനത്തിരക്കേറെയുള്ള വേദികളുടെ പരിസര കാഴ്ച്ചകൾ പകർത്താനും ഈ കുട്ടിക്കൂട്ടം ക്യാമറയുമായുണ്ട്. പത്തോളം കുട്ടികൾ ചാനലിന് വേണ്ടിയും പ്രവർത്തിക്കുന്നുണ്ട്.

ലിറ്റിൽ കൈറ്റ്സിന് വേണ്ടി കുട്ടികൾ പകർത്തുന്ന ചിത്രങ്ങൾ സ്കൂൾ വിക്കിയിൽ അപ് ലോഡ് ചെയ്യുകയും ലിറ്റിൽ കൈറ്റ്സ് വെബ്സൈറ്റിൽ ചേർക്കുകയും ചെയ്യുന്നുണ്ട്. കൂടാതെ മത്സരാർത്ഥികൾക്ക് ആവശ്യമായ വിവരങ്ങൾ നൽകാൻ എല്ലാ വേദികളിലും ഹെല്പ് ഡെസ്കും ലിറ്റിൽ കൈറ്റ്സിന്റെ നേതൃത്വത്തിൽ പ്രവർത്തിക്കുന്നുണ്ട്. കുട്ടികൾ റിപ്പോർട്ട് ചെയ്യുന്ന വാർത്തകൾ ചാനലിലൂടെയാണ് സംപ്രേക്ഷണം ചെയ്യുന്നത്.

കലോല്‍സവത്തിലെ വിവിധ രചനാ മത്സരങ്ങള്‍(കഥ, കവിത, ചിത്രരചന, കാര്‍ട്ടൂണ്‍, പെയിന്റിങ്ങ് തുടങ്ങിയവ) ഫലപ്രഖ്യാപനത്തിനുശേഷം സ്കൂള്‍ വിക്കിയില്‍ (www.schoolwiki.in) അപ്‌ലോഡ് ചെയ്യുന്ന പ്രവർത്തനത്തിനും ലിറ്റിൽ കൈറ്റ്സ് വളൻ്റിയർമാരാണുള്ളത്.