ഗൂഢാലോചന കേസ്; പ്രതികള് നിയമത്തിന് വഴങ്ങണമെന്ന് പ്രോസിക്യൂഷന്
- Posted on February 04, 2022
- Cinemanews
- By NAYANA VINEETH
- 206 Views
ദിലീപിനെതിരെ വാദങ്ങള് നിരത്തി പ്രോസിക്യൂഷന് ഭാഗം
ഗൂഡാലോചന നടത്തിയ കേസില് ദിലീപിനെതിരെ വാദങ്ങള് നിരത്തി പ്രോസിക്യൂഷന് ഭാഗം. അന്വേഷണ ഉദ്യോഗസ്ഥരെ അപായപ്പെടുത്താന് ശ്രെമിച്ച കേസിലാണ് ആരോപണം ഉയരുന്നത്. ദിലീപ് ഉള്പ്പെടെയുള്ള പ്രതികളെ കസ്റ്റഡിയില് എടുത്തുള്ള അന്വേഷണത്തില് മാത്രമേ വസ്തുതകള് ശേഖരിക്കാനാകൂ എന്ന് പ്രോസിക്യൂഷന് കോടതിയില് ചൂണ്ടിക്കാട്ടി.
പ്രതികളെ കസ്റ്റഡിയില് വിട്ടിരുന്നെങ്കില് ഗൂഡാലോചന തെളിയിക്കാന് കഴിയുമായിരുന്നു. പ്രതികള്ക്ക് സംരക്ഷണം നല്കിയുള്ള ഇടക്കാല കോടതി ഉത്തരവ് അന്വേഷണത്തെ ബാധിച്ചു. പ്രതികള് തെളിവ് നശിപ്പിക്കാനും സാക്ഷികളെ സ്വാധീനിക്കാനും സാധ്യതയുണ്ടെന്നും പ്രോസിക്യൂഷന് വാദിച്ചു.
ദിലീപിന് മാത്രം എന്താണ് പ്രത്യേകതയെന്ന് ചോദിച്ച പ്രോസിക്യൂഷന് ദിലീപ് നിയമത്തിന് വഴങ്ങണമെന്ന് ചൂണ്ടിക്കാട്ടി. ദിലീപിന് ജാമ്യത്തിന് അര്ഹതയില്ലെന്ന് ആവര്ത്തിച്ച പ്രോസിക്യൂഷന് പ്രതികളുടെ പശ്ചാത്തലം കൂടി ജാമ്യാപേക്ഷയില് പരിഗണിക്കണമെന്നാവശ്യപ്പെട്ടു.
സമാനതകളില്ലാത്ത കുറ്റകൃത്യത്തില് നിന്നാണ് കേസിന്റെ തുടക്കം. സഹപ്രവര്ത്തകയെ പീഡിപ്പിച്ചതിന്റെ വിഡിയോ ലഭിക്കാന് ക്വട്ടേഷന് നല്കിയവരാണ് പ്രതികള്. പ്രതികളിലൊരാള് സെലിബ്രിറ്റിയായിരിക്കാം. എന്നാല് ഏതെങ്കിലും തരത്തിലുള്ള നിയമപരിരക്ഷ പ്രതിക്ക് നല്കിയാല് പൊതുജനങ്ങള്ക്ക് നിയമ സംവിധാനത്തില് വിശ്വാസ്യത നഷ്ടപ്പെടുമെന്ന് പ്രോസിക്യൂഷന് വിശദീകരിച്ചു.