ഭിന്നശേഷിക്കാർക്ക് കൈത്താങ്ങായി എൻജിനിയറിങ് വിദ്യാർഥികളുടെ നൂതന സാങ്കേതിക പരിഹാരങ്ങൾ

കൊല്ലം: ഭിന്നശേഷിക്കാരുടെ ദൈനംദിന ജീവിതം കൂടുതൽ സുരക്ഷിതവും സ്വതന്ത്രവുമാക്കാൻ ലക്ഷ്യമിട്ട് 100-ലധികം സഹായ സാങ്കേതികവിദ്യ (Assistive Technology) പദ്ധതികൾ വികസിപ്പിച്ച് ശ്രദ്ധേയമായ നേട്ടം കൈവരിച്ച് കൊല്ലം പരിപ്പള്ളിയിലെ യുകെഎഫ് കോളേജ് ഓഫ് എൻജിനിയറിങ് ആൻഡ് ടെക്‌നോളജി (ഓട്ടോണമസ്). ഒന്നാം വർഷ എൻജിനിയറിങ് വിദ്യാർഥികൾ തയ്യാറാക്കിയ ഈ പദ്ധതികൾ കോളേജിൽ സംഘടിപ്പിച്ച അസിസ്റ്റീവ് ടെക്‌നോളജി പ്രോജക്ട് എക്‌സ്‌പോയിൽ അവതരിപ്പിച്ചു.

കോളേജിന്റെ സ്വയംഭരണ പാഠ്യപദ്ധതിയുടെ ഭാഗമായ 'U1 EDGE' (Employability Development and Growth through Education) പദ്ധതിയിലൂടെയാണ് ഈ നവീന ആശയങ്ങൾ രൂപം കൊണ്ടത്. ഭിന്നശേഷിക്കാർ നേരിടുന്ന യഥാർത്ഥ പ്രശ്നങ്ങൾ മനസ്സിലാക്കാൻ വിദ്യാർഥികൾ ഒരു സെമസ്റ്റർ മുഴുവൻ അവരുമായി നേരിട്ട് ഇടപഴകുകയും തുടർന്ന് അധ്യാപകരുടെ മാർഗനിർദേശത്തിൽ പരിഹാരങ്ങൾ വികസിപ്പിക്കുകയുമായിരുന്നു.

പ്രദർശനത്തിൽ സോഫ്റ്റ്‌വെയറും ഹാർഡ്‌വെയറും സംയോജിപ്പിച്ച നിരവധി ഉപകരണങ്ങൾ അവതരിപ്പിച്ചു. കാഴ്ചപരിമിതിയുള്ളവർക്കായുള്ള സ്മാർട്ട് സ്റ്റിക്ക്, ശബ്ദനിയന്ത്രിത വീൽചെയർ, ശ്രവണ മുന്നറിയിപ്പ് സംവിധാനം, ബ്രെയിൽ പഠന ബോർഡ്, ട്രാക്കിങ് സൗകര്യമുള്ള സ്മാർട്ട് കണ്ണട, ശബ്ദം തിരിച്ചറിയുന്ന ധരിക്കാവുന്ന ഉപകരണം, അടിയന്തര സഹായ മൊബൈൽ ആപ്പ്, മരുന്ന് കഴിക്കാനുള്ള ഓർമ്മപ്പെടുത്തൽ സംവിധാനം, ഹൈഡ്രോളിക് അസിസ്റ്റ് ചെയർ, കയ്യടി ഉപയോഗിച്ച് പ്രവർത്തിക്കുന്ന സ്വിച്ച്, കാഴ്ചപരിമിതർക്കുള്ള അസിസ്റ്റന്റ് സിസ്റ്റം എന്നിവയാണ് പ്രധാന ആകർഷണങ്ങൾ.

ഈ പദ്ധതികളുടെ ലക്ഷ്യം ഭിന്നശേഷിക്കാർക്ക് സഞ്ചാരസ്വാതന്ത്ര്യം, ആശയവിനിമയ സൗകര്യം, ദൈനംദിന പ്രവർത്തനങ്ങളിൽ സ്വയംപര്യാപ്തത, സുരക്ഷ, പ്രവേശന സൗകര്യം എന്നിവ വർധിപ്പിക്കുകയാണ്.

സാമൂഹിക പ്രസക്തിയുള്ള പ്രോജക്ട് അധിഷ്ഠിത പഠനത്തിലൂടെ വിദ്യാർഥികളിൽ സർഗാത്മകത, സാങ്കേതിക വൈദഗ്ധ്യം, പ്രശ്നപരിഹാരശേഷി, ടീം വർക്ക്, ആശയവിനിമയ കഴിവ് എന്നിവ വളർത്തിയെടുക്കാനാണ് U1 EDGE പദ്ധതിയിലൂടെ ലക്ഷ്യമിടുന്നതെന്ന് കോളേജ് അധികൃതർ അറിയിച്ചു.

വിദ്യാർഥികളുടെ പദ്ധതികൾ ഉയർന്ന നിലവാരത്തിലുള്ള നവീനതയും സാമൂഹിക പ്രതിബദ്ധതയും ഒരുപോലെ പ്രകടമാക്കുന്നതാണെന്ന് കോളേജ് പ്രിൻസിപ്പൽ ഡോ. ജയരാജു മാധവനും വൈസ് പ്രിൻസിപ്പൽ ഡോ. വി. എൻ. അനീഷും അഭിപ്രായപ്പെട്ടു.

സാങ്കേതികവിദ്യയെ സമൂഹത്തിലെ ഏറ്റവും ആവശ്യക്കാർക്ക് പ്രയോജനപ്പെടുത്തുന്ന ഇത്തരം സംരംഭങ്ങൾ, ഭിന്നശേഷിക്കാരുടെ ജീവിതനിലവാരം ഉയർത്തുന്നതിനൊപ്പം സാമൂഹിക ഉത്തരവാദിത്തമുള്ള എൻജിനിയർമാരെ വളർത്തിയെടുക്കുന്നതിനും വഴിയൊരുക്കുമെന്ന് വിദ്യാഭ്യാസ വിദഗ്ധർ വിലയിരുത്തുന്നു.