ജനാധിപത്യ പ്രക്രിയിൽ സമ്പൂർണ്ണ സമൂഹ പങ്കാളിത്തം ഉറപ്പാക്കണം: ബീച്ച് പഞ്ചായത്ത്.

കണ്ണൂർ: ജനാധിപത്യ പ്രക്രിയകളിലും  തദ്ദേശ ഭരണത്തിലും  സമൂഹത്തിൻ്റെ സമ്പൂർണ്ണ പങ്കാളിത്തം ഉറപ്പാക്കണമെന്ന്    പയ്യാമ്പലത്ത് നടന്ന ബീച്ച് പഞ്ചായത്ത് ആവശ്യപ്പെട്ടു. സംസ്ഥാന ഭരണകൂടവും രാഷ്ട്രീയ പാർട്ടികളും ആസൂത്രണത്തിന് നേതൃത്വം വഹിക്കുന്നവരും ഇക്കാര്യം ഉറപ്പാക്കണമെന്നും വിദഗ്ധർ  അഭിപ്രായപ്പെട്ടു.  

കേരള അസോസിയേഷൻ ഓഫ് പ്രൊഫഷണൽ സോഷ്യൽ വർക്കേഴ്സിൻ്റെ രണ്ട് ദിവസത്തെ  പത്താം സ്റ്റേറ്റ് കോൺഗ്രസിൻ്റെ ഭാഗമായാണ്  പയ്യാമ്പലം  ബീച്ചിൽ  രാഷ്ട്രീയ സംവാദം സംഘടിപ്പിച്ചത്. 

യുവതലമുറയിൽ രാഷ്ട്രീയ ബോധവും  ജനാധിപത്യ ബോധവും വളർത്തണമെന്നും അതിനായി വിദ്യാഭ്യാസ കാലത്ത് പ്രത്യേക പരിശീലനം ആവശ്യമാണന്നും പൊതു അഭിപ്രായം ഉയർന്നു. 

പുതുതായി  തിരഞ്ഞെടുക്കപ്പെടുന്ന ജനപ്രതിനിധികൾക്ക് പ്രാഥമിക പരിശീലനങ്ങൾക്കപ്പുറം  ആസൂത്രണത്തിലും നടത്തിപ്പിലും   സർവ്വതല സ്പർശിയായ വികസനത്തിനും നേതൃത്വം നൽകുന്ന ജനനായകരായി  അവരെ മാറ്റുന്നതിനും അടിത്തറയുള്ളതും മികവുറ്റതുമായി പരിശീലനം അത്യാവശ്യമാണന്നും ചർച്ചയിൽ പങ്കെടുത്തവർ പറഞ്ഞു. 

രാജ്യത്ത് പല കാര്യങ്ങളിലും കേരളം ഏറെ മുന്നിലാണങ്കിലും  ഇനിയും ഒട്ടേറെ ലോക മാതൃകകൾ സൃഷ്ടിക്കാനുണ്ടന്നും ചർച്ചയിൽ പങ്കെടുത്ത മുൻ എം.എൽ.എ യും  സി. പി. എം. സംസ്ഥാന കമ്മിറ്റിയംഗവുമായ പ്രകാശൻ മാസ്റ്റർ പറഞ്ഞു. '

ഗ്രാമസഭകളിൽ വാർഡിലെ മുഴുവൻ ജനങ്ങളുടെയും  പങ്കാളിത്തം ഉറപ്പാക്കണമെന്നും ആസൂത്രണത്തിലും നടത്തിപ്പിലും വിവിധ മേഖലകളിൽ നിന്നുള്ളവരുടെ ഇടപെടലുമുണ്ടാവണമെന്ന്    കോൺഗ്രസ്  നേതാവ് രജിത്ത് നാറാത്ത് പറഞ്ഞു. 

 ജൻ സി  വിഭാഗത്തെയും കുട്ടികളെയും     ജനാധിപത്യത്തിലേക്ക് അടുപ്പിക്കണമെന്നും പാർശ്വവൽക്കരിക്കപ്പെട്ട ജനതയുടെ കൂടി വികസനം സാധ്യമാക്കണമെന്നും   ക്ഷേമമെന്നത് ആശയ തലത്തിൽ മാത്രമല്ല പ്രായോഗിക തലത്തിലും ഉണ്ടാവണമെന്നും സംവാദത്തിൽ  പങ്കെടുത്ത മുതിർന്ന  മാധ്യമ പ്രവർത്തകൻ പി.  സുധാകരൻ പറഞ്ഞു.

 തദ്ദേശ ഭരണകൂടങ്ങൾ   നൂതനാശയങ്ങൾ നടപ്പാക്കുന്നതിന് കേരളത്തിലെ വിദഗ്ധരുടെയും പ്രൊഫഷണൽ സോഷ്യൽ വർക്കേഴ്സിൻ്റെയും വിവിധ വിഷയങ്ങളിൽ വൈദഗ്ധ്യമുള്ളവരുടെയും സഹകരണം ഉറപ്പാക്കണമെന്ന്    സാമൂഹ്യ ശാസ്ത്രജ്ഞരും    പരീശലകരുമായ   ഡോ. എം.പി.ആൻ്റണി ,  ഫാ. ജോയി ജെയിംസ്  തുടങ്ങിയവർ നിർദ്ദേശിച്ചു. 

സാമൂഹ്യ പ്രവർത്തക ദയാ ഭായ് ബീച്ച് പഞ്ചായത്ത് ഉദ്ഘാടനം ചെയ്തു. മാധ്യമ പ്രവർത്തകൻ സി.വി.ഷിബു മോഡറേറ്ററായിരുന്നു.