പ്രമുഖ കലാസംവിധായകൻ കെ ശേഖർ അന്തരിച്ചു; വിടവാങ്ങിയത് ‘മൈ ഡിയർ കുട്ടിച്ചാത്തൻ’ ഉൾപ്പെടെയുള്ള ഹിറ്റ് ചിത്രങ്ങളുടെ കലാസംവിധായകൻ.

തിരുവനന്തപുരം : പ്രമുഖ കലാസംവിധായകൻ കെ ശേഖർ അന്തരിച്ചു. 72 വയസായിരുന്നു. തിരുവനന്തപുരത്തെ വീട്ടിൽ വെച്ചായിരുന്നു അന്ത്യം. ‘മൈ ഡിയർ കുട്ടിച്ചാത്തൻ’ ഉൾപ്പെടെയുള്ള ഹിറ്റ് ചലച്ചിത്രങ്ങളുടെ കലാസംവിധായകനായിരുന്നു ഇദ്ദേഹം. ഈ ചിത്രത്തിലെ ‘ആലിപ്പഴം പെറുക്കാം’ എന്ന ഗാനത്തിന്റെ കലാസംവിധായകനായിരുന്നു കെ ശേഖർ. പാട്ടിൽ ശ്രദ്ധിക്കപ്പെട്ട കറങ്ങുന്ന മുറി രൂപകൽപ്പന ചെയ്തത് ഇദ്ദേഹമായിരുന്നു.കേരള സർവകാശാലയിൽനിന്ന് ബിരുദാനന്തര ബിരുദം നേടിയശേഷമാണ് കലാസംവിധാനരം​ഗത്തേക്ക് എത്തുന്നത്. 1982 ജിജോ പുന്നൂസ് സംവിധാനം ചെയ്ത പടയോട്ടം എന്ന ചിത്രത്തിലൂടെയാണ് അദ്ദേഹം മലയാള സിനിമയിലേക്കെത്തുന്നത്. ഈ ചിത്രത്തിലെ കോസ്റ്റ്യൂം പബ്ലിസിറ്റി ഡിസൈനർ ആയിരുന്നു ശേഖർ. തുടന്ന് മൈ ഡിയർ കുട്ടിച്ചാത്തൻ, നോക്കാത്ത ദൂരത്ത് കണ്ണും നട്ട് എന്നിങ്ങനെ നിരവധി സിനിമകളുടെ കലാസംവിധായകനായി പ്രവർത്തിച്ചു. വീട്ടിലെ പൊതുദര്‍ശനത്തിനുശേഷം വൈകുന്നേരം അഞ്ചിന് തൈക്കാട് ശാന്തികവാടത്തില്‍ മൃതദേഹം സംസ്കരിച്ചു.