ടിക്കറ്റിൽ രേഖപ്പെടുത്തിയിട്ടുള്ള സ്റ്റേഷനിൽ നിന്ന് തന്നെ യാത്രക്കാർ ട്രെയിൻ കയറണമെന്ന് റെയിൽവേ.

ന്യൂഡൽഹി* : ബോർഡിംഗ് സ്റ്റേഷനിൽ നിന്ന് ട്രെയിൻ പുറപ്പെടുകയും ആ സീറ്റിൽ യാത്രക്കാരൻ ഇല്ലാതിരിക്കുകയും ചെയ്താൽ, ആ സീറ്റ് ഒഴിവുള്ളതായി കണക്കാക്കും_

ട്രെയിൻ ബോർഡിംഗ് നിയമങ്ങളിൽ വലിയ മാറ്റം പ്രഖ്യാപിച്ച് ഇന്ത്യൻ റെയിൽവേ. ഇനി മുതൽ യാത്രക്കാർ അവരുടെ ടിക്കറ്റിൽ രേഖപ്പെടുത്തിയിരിക്കുന്ന സ്റ്റേഷനിൽ നിന്ന് തന്നെ ട്രെയിനിൽ കയറേണ്ടി വരും. അതായത്, ഒരു യാത്രക്കാരൻ നിശ്ചയിക്കപ്പെട്ട ബോർഡിംഗ് സ്റ്റേഷനിൽ നിന്ന് ട്രെയിനിൽ കയറിയില്ലെങ്കിൽ, അടുത്ത സ്റ്റേഷൻ വരെ ടി.ടി.ഇ (TTE) അവർക്കായി കാത്തിരിക്കില്ല.

ബോർഡിംഗ് സ്റ്റേഷനിൽ നിന്ന് ട്രെയിൻ പുറപ്പെടുകയും ആ സീറ്റിൽ യാത്രക്കാരൻ ഇല്ലാതിരിക്കുകയും ചെയ്താൽ, ആ സീറ്റ് ഒഴിവുള്ളതായി കണക്കാക്കും. യാത്രക്കാരൻ എത്തിയിട്ടില്ല എന്ന് ടിക്കറ്റ് പരിശോധനയ്ക്കിടെ വ്യക്തമായാൽ ടി.ടി.ഇ ഉടൻ തന്നെ തന്റെ കൈവശമുള്ള ഹാൻഡ്‌ഹെൽഡ് ഉപകരണത്തിൽ ‘നോ ഷോ’ (No Show) എന്ന് എൻട്രി രേഖപ്പെടുത്തും. യാത്രക്കാരൻ നിശ്ചിത സ്റ്റേഷനിൽ നിന്ന് ട്രെയിനിൽ കയറിയിട്ടില്ല എന്നാണ് ഇത് സൂചിപ്പിക്കുന്നത്.

ഈ എൻട്രി രേഖപ്പെടുത്തുന്ന നിമിഷം തന്നെ സിസ്റ്റത്തിൽ ആ സീറ്റ് ഒഴിവുള്ളതായി കാണിക്കുകയും പിന്നീട് അത് തടഞ്ഞുവെക്കാൻ സാധിക്കാതിരിക്കുകയും ചെയ്യും. ഇത്തരത്തിൽ ഒരു സീറ്റ് ഒഴിവായി പ്രഖ്യാപിച്ചാലുടൻ റെയിൽവേ സംവിധാനം അത് വെയിറ്റിംഗ് ലിസ്റ്റിലോ ആർ.എ.സി (RAC) ടിക്കറ്റിലോ ഉള്ള അടുത്ത യാത്രക്കാരന് ഓട്ടോമാറ്റിക്കായി അനുവദിച്ചു നൽകും. ഈ മാറ്റം വെയിറ്റിംഗ് ലിസ്റ്റിലും ആർ.എ.സിയിലുമുള്ള യാത്രക്കാർക്ക് വലിയ തോതിൽ ഗുണകരകമാകും.