' പൊതുവിദ്യാലയങ്ങളിൽ എല്ലാ കുട്ടികൾക്കും സൗജന്യ യൂണിഫോം' ആധാറില്ലെങ്കിലും പേടിക്കേണ്ടെന്ന് സഭയിൽ വിദ്യാഭ്യാസ മന്ത്രിയുടെ ഉറപ്പ്

സി.ഡി. സുനീഷ്

പൊതുവിദ്യാലയങ്ങളിലെ വിദ്യാർഥികളുടെ ആധാർ അധിഷ്ഠിത തസ്‌തിക നിർണയ പ്രതിസന്ധി പരിഹരിക്കുമെന്ന് വിദ്യാഭ്യാസമന്ത്രി വി ശിവൻകുട്ടി. എല്ലാ വിദ്യാർത്ഥികൾക്ക് സൗജന്യ യൂണിഫോം ഉറപ്പാക്കുമെന്നും മന്ത്രി വി ശിവൻകുട്ടി നിയമസഭയിൽ പറഞ്ഞു. ഒരു അധ്യാപകർക്കും ജോലി നഷ്‌ടപ്പെടാൻ പാടില്ലെന്നും വിദ്യാഭ്യാസ മന്ത്രി അറിയിച്ചു. വിദ്യാഭ്യാസ മേഖലയിലെ ഈ ഗുരുതര പ്രശ്ന‌ം ട്വന്റിഫോറാണ് വാർത്തയാക്കിയിരുന്നത്. പിന്നാലെ വിഷയം സഭയിലെത്തുകയായിരുന്നു.

സംസ്ഥാനത്തെ പൊതുവിദ്യാലയങ്ങളിൽ 57130 വിദ്യാർഥികൾക്ക് ആധാർ ഇല്ലെന്നാണ് കണക്ക്. ഈ കുട്ടികൾക്ക് സൗജന്യ യൂണിഫോം ലഭിക്കില്ലെന്നും, 4090 അധ്യാപക സൃഷ്ടികൾ ഇല്ലാതാകുമെന്നുമായിരുന്നു റിപ്പോർട്ട്. 24 വാർത്തയ്ക്ക് പിന്നാലെ വിഷയം വർക്കല എംഎൽഎ വി ജോയി സബ്‌മിഷനായി സഭയിൽ അവതരിപ്പിച്ചു. ഗുരുതര പ്രശ്‌നമാണെന്ന് സമ്മതിച്ച വിദ്യാഭ്യാസ മന്ത്രി കുട്ടികളുടെയും അധ്യാപകരുടെയും അവകാശ സംരക്ഷിക്കുമെന്ന് അറിയിച്ചു. എല്ലാവർക്കും യൂണിഫോം നൽകുമെന്നും മന്ത്രി ഉറപ്പ് നൽകി.

അധ്യാപക നിയമനത്തിലെ ഭിന്നശേഷി സംവരണ വിധിയെ തുടർന്ന് എയ്‌ഡഡ് സ്കൂൾ മാനേജ്മെന്റുകൾക്ക് കീഴിൽ ജോലി നേടിയ അധ്യാപകരുടെ ജോലി അസ്ഥിരപ്പെടുന്ന പ്രശ്‌നം മോൻസ് ജോസഫ് എം എൻ എ ശ്രദ്ധ ക്ഷണിക്കലിലിൽ സഭയിൽ ഉന്നയിച്ചു. എന്നാൽ വിഷയം അവതരിപ്പിക്കുന്നതിനിടെ മന്ത്രിയ്ക്ക് സാമാന്യ ബോധം ഇല്ലെന്ന പരാമർശം തർക്കത്തിന് ഇടയാക്കി. എംഎൽഎ ആവേശത്തിൽ പറഞ്ഞതാകാമെന്നും പ്രശ്‌നം ഇവിടെ അവസാനിപ്പിക്കാമെന്നും മന്ത്രി വി ശിവൻകുട്ടി നിലപാട് എടുത്തതോടെയാണ് തർക്കം അവസാനിച്ചത്.