സ്വർണക്കൊള്ള കേസ്; എൻ. വാസുവിന് കൈവിലങ്ങ് വച്ച നടപടി; ഡിജിപിക്ക് അതൃപ്തി, പോലീസുകാർക്കെതിരെ നടപടിക്ക് സാധ്യത.

സി.ഡി. സുനീഷ്

ശബരിമല സ്വർണക്കൊള്ള കേസിൽ പ്രതിയായ മുൻ ദേവസ്വം പ്രസിഡന്റും ദേവസ്വം കമ്മീഷണറുമായിരുന്ന എൻ. വാസുവിനെ കോടതിയിൽ ഹാജരാക്കിയപ്പോൾ കൈവിലങ്ങ് അണിയിച്ച സംഭവത്തിൽ പോലീസുദ്യോഗസ്ഥർക്കെതിരെ നടപടി വരാൻ സാധ്യത. തിരുവനന്തപുരം എ.ആർ. ക്യാമ്പിലെ പോലീസ് ഉദ്യോഗസ്ഥരാണ് പൂജപ്പുര സെൻട്രൽ ജയിലിൽ നിന്ന് വാസുവിനെ കൊല്ലത്തെ വിജിലൻസ് കോടതിയിലേക്ക് കൈവിലങ്ങോടെ കൊണ്ടുപോയത്.

ഏതൊക്കെ പ്രതികളെയാണ് കൈവിലങ്ങ് വെച്ച് ഹാജരാക്കേണ്ടത് എന്നതുമായി ബന്ധപ്പെട്ട് ഭാരതീയ ന്യായ സംഹിതയിൽ (ബിഎൻഎസ്) നൽകിയിരിക്കുന്ന നിയമങ്ങൾക്ക് വിരുദ്ധമായാണ് ഉദ്യോഗസ്ഥരുടെ നടപടിയെന്ന് സ്പെഷ്യൽ ബ്രാഞ്ച് ഡി.ജി.പിക്ക് റിപ്പോർട്ട് നൽകി. ഈ വിഷയത്തിൽ ഡി.ജി.പി അതൃപ്തി രേഖപ്പെടുത്തിയിട്ടുണ്ട്.

പ്രതിയുടെ പ്രായം, ഉൾപ്പെട്ട കുറ്റകൃത്യങ്ങളുടെ സ്വഭാവം തുടങ്ങിയ നിയമപരമായ മാനദണ്ഡങ്ങൾ പാലിക്കാതെ കൈവിലങ്ങ് വെച്ചത് സർക്കാരിന് അവമതിപ്പുണ്ടാക്കി എന്നാണ് വിലയിരുത്തൽ. സ്പെഷ്യൽ ഇൻവെസ്റ്റിഗേഷൻ ടീം (എസ്ഐടി) ഉദ്യോഗസ്ഥർ അറിയാതെയാണ് ഇത് സംഭവിച്ചതെന്നും, എ.ആർ. ക്യാമ്പിലെ പോലീസുകാർക്കെതിരെ ഉടൻ നടപടിയുണ്ടാകുമെന്നുമാണ് സൂചന.